ಕಾಯಿಲೆ ಮನುಷ್ಯನಿಗೆ ಬರದೇ ಮರಕ್ಕೆ ಬರುತ್ತಾ ಎಂದು ಈ ಹಿಂದೆ ನಮ್ಮ ಹಿರಿಯರು ಮಾತನಾಡಿ ಕೊಳ್ಳುತ್ತಿದ್ದರು. ಆದರೆ ಈಗ ಮರಗಳಿಗೂ ಸಹ ಒಂದಲ್ಲ ಒಂದು ಕಾಯಿಲೆಗಳು ಬಾಧಿಸುತ್ತವೆ. ಆ ವಿಷಯ ಬಿಡಿ. ನಾವು ಮನುಷ್ಯರಾಗಿ ನಮಗೆ ಬರುವ ಆರೋಗ್ಯ ಸಮಸ್ಯೆಗಳ ಕಡೆಗೆ ಗಮನಕೊಡಬೇಕು.
ಕೊಡಗಿನಲ್ಲಿ ಭಾರೀ ಮಳೆ: ಬೆಂಗೂರು ದೋಣಿಕಾಡು ಮತ್ತೆ ಮುಳುಗಡೆ..ದೋಣಿಯಲ್ಲಿ ಓಡಾಟ!
ಹೆಚ್ಚು ಕಡಿಮೆ ಪುಟ್ಟ ಮಕ್ಕಳಿಂದ ಹಿಡಿದು ದೊಡ್ಡವರು ಮತ್ತು ವಯಸ್ಸಾದವರು ಸಹ ಹಲವಾರು ಕಾಯಿಲೆಗಳನ್ನು ಮತ್ತು ಆರೋಗ್ಯ ಸಮಸ್ಯೆಗಳನ್ನು ಅನುಭವಿಸುತ್ತಾರೆ. ಇವುಗಳಲ್ಲಿ ತಲೆ ಮೇಲೆ ಕೈಹೊತ್ತು ಕುಳಿತುಕೊಳ್ಳುವಂತಹ ತಲೆ ನೋವು ಕೂಡ ಬಂದು.
ತುಂಬಾ ಜನರಿಗೆ ತಲೆ ನೋವು ಒಂದು ಬಿಟ್ಟೂ ಬಿಡದ ಸಮಸ್ಯೆಯಾಗಿ ಧೀರ್ಘಕಾಲ ಕಾಡುತ್ತದೆ. ತಲೆನೋವಿನ ಕಾರಣದಿಂದ ಕೆಲವರು ಸುಯಿಸೈಡ್ ಕೂಡ ಮಾಡಿಕೊಂಡಿದ್ದಾರೆ. ಅಂದರೆ ಅಷ್ಟು ಗಂಭೀರ ಪ್ರಮಾಣದಲ್ಲಿ ತಲೆ ನೋವು ಅವರಿಗಿರುತ್ತದೆ. ತಲೆ ನೋವಿನ ಕಾರಣಗಳನ್ನು ಅವಲೋಕಿಸಿ ನೋಡಿದರೆ ಅದರಲ್ಲಿ ಜೀವನ ಶೈಲಿಯಲ್ಲಿನ ಲೋಪ ದೋಷಗಳೇ ಹೆಚ್ಚಾಗಿರುತ್ತವೆ. ಅಂದರೆ ರಾತ್ರಿ ಹೊತ್ತು ಸರಿಯಾಗಿ ನಿದ್ರೆ ಮಾಡದೇ ಇರುವುದು, ಪ್ರತಿದಿನ ಮಲಗುವ ಮುಂಚೆ ಕಾಫಿ ಅಥವಾ ಆಲ್ಕೋಹಾಲ್ ಕುಡಿಯುವುದು ಈ ರೀತಿ. ಇದರ ಜೊತೆಗೆ ಅನುವಂಶೀಯ ಕಾರಣಗಳು ಮತ್ತು ಇನ್ನು ಹಲವು ತೊಂದರೆಗಳಿಂದ ತಲೆನೋವು ಬರುವ ಸಾಧ್ಯತೆ ಇರುತ್ತದೆ. ಪ್ರಸ್ತುತ ಈ ಲೇಖನದಲ್ಲಿ ದಿನಾ ಬೆಳಗ್ಗೆ ತಲೆನೋವು ಏಕೆ ಬರುತ್ತದೆ ಮತ್ತು ಅದರ ನಿರ್ವಹಣೆಯ ಕ್ರಮಗಳು ಹೇಗೆ ಎಂಬುದರ ಬಗ್ಗೆ ತಿಳಿಸಿಕೊಡಲಾಗಿದೆ.
ಬೆಳ್ಳಂ ಬೆಳಗ್ಗೆ ಎದ್ದ ತಕ್ಷಣ ತಲೆನೋವು ಬಂದರೆ ಅದಕ್ಕೆ ನಿದ್ರಾಹೀನತೆ ಸಮಸ್ಯೆ ಕಾರಣವಾಗಿರಬಹುದು ಅಥವಾ ನಿದ್ರೆಯಲ್ಲಿ ಆಗಾಗ ಎಚ್ಚರಗೊಳ್ಳುವುದು ಕೂಡ ಒಂದು ಕಾರಣ ಎನ್ನಬಹುದು. ಕೆಲವರಿಗೆ ಪ್ರತಿದಿನ ಒಂದೇ ಸಮಯಕ್ಕೆ ಮಲಗಿ ಅಭ್ಯಾಸವಾಗಿರುತ್ತದೆ. ಅಪ್ಪಿ ತಪ್ಪಿ ಈ ಸಮಯ ಬದಲಾದರೆ ಅದರಿಂದ ಬೆಳಗ್ಗೆ ಎದ್ದ ತಕ್ಷಣ ತಲೆನೋವು ಕಾಣಿಸುತ್ತದೆ. ಹಲವರಲ್ಲಿ ನೀವು ಗಮನಿಸಿರಬಹುದು, ಮಲಗಿರುವ ಸಂದರ್ಭದಲ್ಲಿ ಉಸಿರಾಟ ಕೆಲವು ಸೆಕೆಂಡುಗಳ ಕಾಲ ನಿಂತು ಹೋಗಿ ಮತ್ತೆ ಪ್ರಾರಂಭವಾಗುತ್ತದೆ. ಇದು ಸಹಜವಾಗಿ ದೇಹದಲ್ಲಿ ಆಮ್ಲಜನಕದ ಕೊರತೆ ಉಂಟು ಮಾಡುತ್ತದೆ ಮತ್ತು ಇದು ಬೆಳಗ್ಗೆ ಎದ್ದ ತಕ್ಷಣ ಮೈಗ್ರೇನ್ ತಲೆ ನೋವು ಕಂಡು ಬರುವಂತೆ ಮಾಡುತ್ತದೆ.
ನಮ್ಮ ದೇಹದಲ್ಲಿ ನೀರಿನ ಅಂಶದ ಕೊರತೆ ಉಂಟಾದಾಗ ಸಹಜವಾಗಿ ಬೆಳಗಿನ ಸಮಯದಲ್ಲಿ ತಲೆನೋವು ಕಂಡು ಬರುತ್ತದೆ. ರಾತ್ರಿ ಮಲಗಿರುವ ಸಂದರ್ಭದಲ್ಲಿ ನಮ್ಮ ದೇಹ ಬೆವರಿನ ರೂಪದಲ್ಲಿ ದೇಹದಿಂದ ನೀರಿನ ಅಂಶವನ್ನು ಕಳೆದುಕೊಳ್ಳುತ್ತದೆ. ಇದು ಬೆಳಗಿನ ಸಮಯದಲ್ಲಿ ನಿರ್ಜಲೀಕರಣ ಆಗುವಂತೆ ಮಾಡುತ್ತದೆ. ದೇಹದಲ್ಲಿ ಸರಿಯಾದ ಮತ್ತು ಸಮರ್ಪಕವಾದ ನೀರಿನ ಅಂಶ ಇಲ್ಲದಿದ್ದರೆ, ಅದು ಬೆಳಗಿನ ಸಮಯದಲ್ಲಿ ತಲೆನೋವು ಕಂಡುಬರುವಂತೆ ಮಾಡುತ್ತದೆ. ಹೀಗಾಗಿ ರಾತ್ರಿ ಮಲಗುವ ಮುಂಚೆ ಒಂದು ಗ್ಲಾಸ್ ನೀರು ಕುಡಿದು ಮಲಗುವುದು ಒಳ್ಳೆಯದು. ಇದು ಬೆಳಗಿನ ಸಮಯದಲ್ಲಿ ತಲೆನೋವು ಕಂಡು ಬರದಂತೆ ಮಾಡುತ್ತದೆ.
ರಾತ್ರಿ ಮಲಗಿರುವ ಸಂದರ್ಭದಲ್ಲಿ ಕೆಲವರಿಗೆ ಹಲ್ಲು ಕಡಿಯುವ ಅಭ್ಯಾಸವಿರುತ್ತದೆ. ಇದನ್ನು bruxism ಎಂದು ಕರೆಯುತ್ತಾರೆ.
ಇದು ನಮ್ಮ ದವಡೆ ಹಲ್ಲುಗಳು ಮತ್ತು ತಲೆಯ ಭಾಗದಲ್ಲಿ ಒತ್ತಡವನ್ನು ಉಂಟು ಮಾಡಿ ತಲೆನೋವು ಕಂಡು ಬರುವಂತೆ ಮಾಡುತ್ತದೆ.
ಮುಖ್ಯವಾಗಿ ಮಹಿಳೆಯರ ದೇಹದಲ್ಲಿ ಕಂಡುಬರುವ ಹಾರ್ಮೋನ್ ಅಸಮತೋಲನ ಬೆಳಗಿನ ಸಮಯದಲ್ಲಿ ತಲೆನೋವು ತರುತ್ತದೆ. ದೇಹದಲ್ಲಿ ಋತುಬಂಧದ ಸಂದರ್ಭದಲ್ಲಿ ಈಸ್ಟ್ರೋಜನ್ ಹಾರ್ಮೋನ್ ವ್ಯತ್ಯಾಸವಾದರೆ ಅದರಿಂದಲೂ ತಲೆನೋವು ಬರುತ್ತದೆ. ಇದೇ ಕಾರಣಕ್ಕೆ ಪೀರಿಯಡ್ಸ್ ಸಂದರ್ಭದಲ್ಲಿ ಹಲವು ಮಹಿಳೆಯರಿಗೆ ತಲೆನೋವು ಕಾಣಿಸುತ್ತದೆ ಮತ್ತು ಇದನ್ನು ನಿರ್ಲಕ್ಷ್ಯ ಮಾಡಬಾರದು ಎಂದು ಹೇಳುತ್ತಾರೆ.
ಸಂಸ್ಕರಿಸಿದ ಮಾಂಸಹಾರಗಳು, ಆಲ್ಕೋಹಾಲ್, ಚೀಸ್, ಕೃತಕ ಸಿಹಿ ಅಂಶಗಳು, ಹಲವರಲ್ಲಿ ಮೈಗ್ರೇನ್ ಕಂಡುಬರುವಂತೆ ಮಾಡುತ್ತದೆ. ಈ ರೀತಿ ಒಂದು ವೇಳೆ ಪದೇ ಪದೇ ತಲೆ ನೋವು ಕಾಣಿಸುತ್ತಿದ್ದರೆ, ಮೊದಲು ಆಹಾರ ಪದ್ಧತಿಯಲ್ಲಿ ಬದಲಾವಣೆ ತಂದುಕೊಂಡು ತಲೆನೋವು ನಿವಾರಣೆ ಮಾಡಿಕೊಳ್ಳಿ.
ಕೆಲವು ಬಾರಿ ಬಿಸಿಲು ಮತ್ತು ಇನ್ನು ಕೆಲವು ಬಾರಿ ಮಳೆ, ಚಳಿ ಕಂಡುಬರುತ್ತದೆ. ಈ ರೀತಿಯ ಪರಿಸರದಲ್ಲಿ ವಾತಾವರಣ ಬದಲಾವಣೆ ಮೈಗ್ರೇನ್ ತಲೆನೋವು ಬರುವಂತೆ ಮಾಡಬಹುದು. ತುಂಬಾ ಸೆನ್ಸಿಟಿವ್ ಇರುವ ಜನರಿಗೆ ಈ ತರಹ ಆಗುವುದು ಸಹಜ.
ಬೆಳಗಿನ ಸಂದರ್ಭದಲ್ಲಿ ಬರುವಂತಹ ಮೈಗ್ರೇನ್ ತಲೆನೋವನ್ನು ಬೇರೆ ಬೇರೆ ವಿಧಾನಗಳಲ್ಲಿ ಕಡಿಮೆ ಮಾಡಿಕೊಳ್ಳಬಹುದು. ಉದಾಹರಣೆಗೆ.
ಹೆಚ್ಚಾಗಿ ನೀರು ಕುಡಿಯುವುದು: ನಿಮಗೆ ಆಗಾಗ ನಿರ್ಜಲೀಕರಣ ಸಮಸ್ಯೆ ಎದುರಾಗುತ್ತಿದ್ದರೆ, ಆಗಾಗ ನೀರು ಕುಡಿಯುವ ಅಭ್ಯಾಸ ಮಾಡಿಕೊಳ್ಳಿ. ಇದು ಮೈಗ್ರೇನ್ ತಲೆನೋವಿನ ಪರಿಹಾರಕ್ಕೆ ಸಹಾಯ ಮಾಡುತ್ತದೆ.
ನೋವು ನಿವಾರಕ ಔಷಧಿಗಳು: ಮೆಡಿಕಲ್ ಶಾಪ್ ಗಳಲ್ಲಿ ಸಿಗುವಂತಹ ತಲೆ ನೋವು ನಿವಾರಣ ಔಷಧಿಗಳನ್ನು ತೆಗೆದುಕೊಳ್ಳುವುದರಿಂದ ಮತ್ತು ವೈದ್ಯರ ಬಳಿ ತಲೆ ನೋವಿಗೆ ಸಂಬಂಧಪಟ್ಟಂತೆ ಸಲಹೆ ಮತ್ತು ಸೂಚನೆಗಳನ್ನು ಪಡೆದುಕೊಳ್ಳುವುದರಿಂದ ತಲೆನೋವು ನಿವಾರಣೆ ಮಾಡಿಕೊಳ್ಳಬಹುದು.
ವಿಶ್ರಾಂತಿ ಅಗತ್ಯ: ದೀರ್ಘ ಉಸಿರಾಟದ ವ್ಯಾಯಾಮಗಳು, ಯೋಗ, ಧ್ಯಾನ ಇವುಗಳನ್ನು ಅಭ್ಯಾಸ ಮಾಡಿಕೊಳ್ಳುವುದರಿಂದ ದೇಹಕ್ಕೆ ಹಾಗೂ ಮನಸ್ಸಿಗೆ ವಿಶ್ರಾಂತಿ ಸಿಗುತ್ತದೆ. ಇದು ನಮ್ಮ ಮಾನಸಿಕ ಮತ್ತು ದೈಹಿಕ ಆರೋಗ್ಯಕ್ಕೆ ತುಂಬಾ ಒಳ್ಳೆಯದು. ತಲೆನೋವಿನ ನಿವಾರಣೆಯಲ್ಲಿ ಇದು ಪ್ರಮುಖವಾಗಿ ಕೆಲಸ ಮಾಡುತ್ತದೆ.
ಒಳ್ಳೆಯ ನಿದ್ರೆ ಅಗತ್ಯ:ರಾತ್ರಿಯ ಸಮಯದಲ್ಲಿ ಒಳ್ಳೆಯ ನಿದ್ರೆ ಮಾಡುವುದು ಬೆಳಗಿನ ಸಮಯದಲ್ಲಿ ಮೈಗ್ರೇನ್ ತಲೆನೋವನ್ನು ಬರದಂತೆ ತಡೆಯುತ್ತದೆ. ರಾತ್ರಿ ಮಲಗುವ ಸಂದರ್ಭದಲ್ಲಿ ಮೊಬೈಲ್, ಲ್ಯಾಪ್ಟಾಪ್ ಅಥವಾ ಟಿವಿ ನೋಡುವ ಅಭ್ಯಾಸದಿಂದ ದೂರವಿರಿ. ಮಲಗುವ ಮುಂಚೆ ಕಾಫಿ ಅಥವಾ ಆಲ್ಕೋಹಾಲ್ ಸೇವಿಸಬೇಡಿ. ಇದು ಮಾನಸಿಕ ಆರೋಗ್ಯದ ಮೇಲೆ ಕೆಟ್ಟ ಪ್ರಭಾವ ಬೀರುತ್ತದೆ ಮತ್ತು ತಲೆನೋವಿಗೆ ಪ್ರಮುಖ ಕಾರಣವಾಗುತ್ತದೆ.
ಹಲ್ಲು ಕಚ್ಚುವ ಅಭ್ಯಾಸದಿಂದ ದೂರವಿರಿ: ರಾತ್ರಿ ಹೊತ್ತು ಒಂದು ವೇಳೆ ಹಲ್ಲು ಕಚ್ಚುವ ಅಭ್ಯಾಸ ನಿಮಗಿದ್ದರೆ, ಅದರಿಂದ ದವಡೆ ನೋವು ಮತ್ತು ತಲೆನೋವು ಹೆಚ್ಚಾಗಿ ಕಂಡು ಬರುತ್ತದೆ. ಇದು ಬೆಳಗಿನ ಸಮಯದಲ್ಲಿ ಮೈಗ್ರೇನ್ ತಲೆನೋವು ಕಾಣಿಸಲು ಕೂಡ ಕಾರಣವಾಗುತ್ತದೆ. ಹಾಗಾಗಿ ಈ ಅಭ್ಯಾಸದಿಂದ ಆದಷ್ಟು ದೂರವಿರಿ.
ನಿಮಗೆ ಪ್ರತಿದಿನ ಬೆಳಗಿನ ಸಮಯದಲ್ಲಿ ತಲೆನೋವು ಬರುತ್ತಿದ್ದರೆ, ಅದನ್ನು ಅತ್ಯಂತ ಪರಿಣಾಮಕಾರಿಯಾಗಿ ನಿರ್ವಹಣೆ ಮಾಡಿಕೊಳ್ಳಲು ನಿಮಗೆ ವೈದ್ಯರ ಸಲಹೆ ಮತ್ತು ಸಮಾಲೋಚನೆ ಬಹಳ ಮುಖ್ಯ. ಅವರ ಸಲಹೆ ಮೇರೆಗೆ ಆಹಾರ ಪದ್ಧತಿ ಮತ್ತು ಜೀವನ ಶೈಲಿಯಲ್ಲಿ ಬದಲಾವಣೆ ತಂದುಕೊಂಡು ಸುಲಭವಾಗಿ ತಲೆನೋವಿನ ಪರಿಹಾರ ಮಾಡಿಕೊಳ್ಳಬಹುದು.
