ಸೈಬರ್ ಕ್ರೈಮ್ ಎನ್ನುವುದು ಈಗೀಗ ಹೆಚ್ಚಾಗುತ್ತಿದೆ. ಅಮಾಯಕರನ್ನು ವಂಚಿಸಲು ಕ್ರಿಮಿನಲ್‌ಗಳು ನಾನಾ ರೀತಿಯಲ್ಲಿ ತಂತ್ರಗಳನ್ನು ಹೆಣೆಯುತ್ತಿದ್ದಾರೆ, ಅಂತೆಯೇ ಸೈಬರ್ ಸೆಕ್ಯುರಿಟಿ ಕಂಪನಿಗಳ ವರದಿಗಳ ಪ್ರಕಾರ ಇಮೇಲ್‌ಗಳ ಮೂಲಕ ಫಿಶಿಂಗ್ ದಾಳಿಯ ಸಂಖ್ಯೆ ಹೆಚ್ಚಳವಾಗುತ್ತಿದೆ. ಫಿಶಿಂಗ್ ಮತ್ತು ಸ್ಕ್ಯಾಮ್ ಪೇಜ್‌ಗಳಿಗೆ ಲಿಂಕ್‌ಗಳನ್ನು ಎನ್‌ಕೋಡ್ ಮಾಡಲು ವಂಚಕರು QR ಕೋಡ್‌ಗಳನ್ನು ಬಳಸುತ್ತಿದ್ದಾರೆ ಎಂಬುದು ಈಗ ಗಮನಕ್ಕೆ ಬಂದಿದೆ. ಹೀಗಾಗಿ ಬಳಕೆದಾರರು ಈ ಬಗ್ಗೆ ಹೆಚ್ಚಿನ ಜಾಗರೂಕತೆ ವಹಿಸಬೇಕಾಗಿದೆ.
ಫಿಶಿಂಗ್ ದಾಳಿ ಎನ್ನುವುದು ಕೂಡಾ ಒಂದು ರೀತಿಯ ಸೈಬರ್ ದಾಳಿಯಾಗಿದೆ. ಇದರಲ್ಲಿ ಹ್ಯಾಕರ್‌ಗಳು ಪ್ರತಿಷ್ಠಿತ ಮೂಲದಿಂದ ಬಂದಿದೆ ಎನ್ನುವಂತೆ ತೋರಿಸುವ ಮೋಸದ ಸಂದೇಶಗಳನ್ನು ಕಳಿಸುತ್ತಾರೆ. ಈ ಪ್ರತಿಷ್ಠಿತ ಹೆಸರನ್ನೇ ಅಸಲಿ ಎಂದು ನಂಬಿ ಮೋಸ ಹೋದರೆ ಕಷ್ಟ ಕಟ್ಟಿಟ್ಟ ಬುತ್ತಿ. ಈ ರೀತಿಯ ದಾಳಿಗಳನ್ನು ಸಾಮಾನ್ಯವಾಗಿ ಇಮೇಲ್ ಮೂಲಕ ಮಾಡಲಾಗುತ್ತದೆ.
ಸೈಬರ್ ದಾಳಿಯನ್ನು ಪ್ರಾರಂಭಿಸಲು ಸೈಬರ್ ಅಪರಾಧಿಗಳು ಲಿಂಕ್‌ಗಳನ್ನು ಕಳುಹಿಸುವುದು ಈಗೀಗ ಸಾಮಾನ್ಯವಾಗಿದೆ. ಅಮಾಯಕರನ್ನು ಗುರಿಯಾಗಿಸಿಕೊಂಡು ಸೈಬರ್ ಕ್ರೈಮ್ ವಂಚಕರು ಬಳಸುವ ತಂತ್ರಗಳ ಬಗ್ಗೆ ಸಾಕಷ್ಟು ಜಾಗೃತಿಯನ್ನೂ ಮೂಡಿಸಲಾಗುತ್ತಿದೆ. ಹೀಗಾಗಿ ಸಾಕಷ್ಟು ಸಂದರ್ಭದಲ್ಲಿ ಜನರು ಈಗ ಅನುಮಾನಸ್ಪದ ಲಿಂಕ್‌ಗಳನ್ನು ಕ್ಲಿಕ್ ಮಾಡುತ್ತಿಲ್ಲ. ಇದನ್ನು ಮನಗಂಡಿರುವ ಸೈಬರ್ ಕ್ರೈಂ ಅಪರಾಧಿಗಳು ಬೇರೆಯದ್ದೇ ದಾರಿಯನ್ನು ಕಂಡುಕೊಂಡಿದ್ದಾರೆ. ಅದೇ ಕ್ಯೂಆರ್ ಕೋಡ್‌ಗಳನ್ನು ಇಮೇಲ್ ಮೂಲಕ ಕಳುಹಿಸಿಕೊಡುವುದು. ಮೋಸದ ಕ್ಯೂಆರ್ ಕೋಡ್‌ಗಳು ಬಳಕೆದಾರರು ಅವುಗಳನ್ನು ಬರೀ ಸ್ಕ್ಯಾನ್ ಮಾಡಲು ಅನುಮತಿಸುತ್ತದೆ ಮತ್ತು ಅಲ್ಲಿಗೆ ಅವರ ಕೆಲಸ ಮುಗಿಯುತ್ತದೆ. ಅಮಾಯಕರನ್ನು ಗುರಿಯಾಗಿಸಲು ಅಪರಾಧಿಗಳು ಈ ವೈಶಿಷ್ಟ್ಯದ ಲಾಭವನ್ನು ಪಡೆದುಕೊಳ್ಳುತ್ತಿದ್ದಾರೆ. QR ಕೋಡ್ ಅನ್ನು ಪರಿಶೀಲಿಸಲು ಮತ್ತು ನಿರ್ಬಂಧಿಸಲು ಯಾವುದೇ ಮಾರ್ಗವಿಲ್ಲ. ಅದೂ ಅಲ್ಲದೆ, ಸ್ಕ್ಯಾನ್ ಮಾಡಿದಾಗ ಯಾವ ಲಿಂಕ್ ತೆರೆದುಕೊಳ್ಳುತ್ತದೆ ಎಂಬುದನ್ನು ಕ್ಯೂಆರ್ ಕೋಡ್ ಹೇಳುವುದಿಲ್ಲ. ಹೀಗಾಗಿ ಫಿಶಿಂಗ್ ಮತ್ತು ಸ್ಕ್ಯಾಮ್ ಪುಟಗಳಿಗೆ ಲಿಂಕ್‌ಗಳನ್ನು ಎನ್‌ಕೋಡ್ ಮಾಡಲು ವಂಚಕರು QR ಕೋಡ್‌ಗಳನ್ನು ಬಳಸುತ್ತಾರೆ.
- ಮೊದಲನೆಯದಾಗಿ QR ಕೋಡ್ ಹೊಂದಿರುವ ಇಮೇಲ್ ಅಪಾಯಕಾರಿ ಎಂಬುದನ್ನು ಅರ್ಥ ಮಾಡಿಕೊಳ್ಳಿ. ಇಮೇಲ್‌ನಲ್ಲಿ ಕೋಡ್ ಇದ್ದರೆ ಅದನ್ನು ಹಾನಿಕಾರಕ ಎಂದು ಪರಿಗಣಿಸಿ.
- ನಿಮ್ಮ ಪಾಸ್‌ವರ್ಡ್‌ ಅವಧಿ ಮುಗಿಯಲಿದೆ ಅಥವಾ ನಿಮ್ಮ ಮೇಲ್ ಬಾಕ್ಸ್‌ಗೆ ನೀವು ಅಕ್ಸೆಸ್ ಅನ್ನು ಕಳೆದುಕೊಳ್ಳಬಹುದು ಎಂಬ ರೀತಿಯ ಸಂದೇಶವುಳ್ಳ ಕೆಲವು ನಕಲಿ ಇಮೇಲ್ ಎಚ್ಚರಿಕೆ ಅಥವಾ ನೋಟಿಫಿಕೇಷನ್‌ ನಿಮಗೆ ಬರಬಹುದು. ಇಮೇಲ್ QR ಕೋಡ್ ಅನ್ನು ಹೊಂದಿದ್ದರೆ ಅದು ನಿಮ್ಮನ್ನು ಹಾನಿಕಾರಕ ವೆಬ್‌ಸೈಟ್‌ಗೆ ಕೊಂಡೊಯ್ಯುವ ಸಾಧ್ಯತೆಯೇ ಹೆಚ್ಚು.ಕ್ಯೂಆರ್ ಕೋಡ್ ಅನ್ನು ಸ್ಕ್ಯಾನ್ ಮಾಡುವ ಮೂಲಕ ತಕ್ಷಣ ಸಮಸ್ಯೆಯನ್ನು ಪರಿಹರಿಸಿಕೊಳ್ಳಬಹುದು ಎಂಬ ಸಂದೇಶ ಕೂಡಾ ಇಲ್ಲಿರುತ್ತದೆ.
- ಈ ಇಮೇಲ್ ಸಂದೇಶ ವಿಶ್ವಾಸಾರ್ಹ ಮೂಲದಿಂದ ಬಂದಿದೆ ಎಂದು ಈ ಇಮೇಲ್ ಸಂದೇಶದಲ್ಲಿ ತಿಳಿಸಲಾಗುತ್ತದೆ ಮತ್ತು ಇದನ್ನು ಎಚ್ಚರಿಕೆಯಿಂದ ಪರಿಗಣಿಸಬೇಕು ಎಂದು ಸೂಚಿಸಲಾಗುತ್ತದೆ. ಇಲ್ಲದೇ ಹೋದರೆ ದೊಡ್ಡ ಸಮಸ್ಯೆ ಇದೆ ಎಂದು ನಂಬುವಂತೆ ಮಾಡಲು ಇಂತಹ ಇಮೇಲ್‌ಗಳು ಸಾಕಷ್ಟು ಬೆದರಿಕೆಯ ಪದಗಳನ್ನೂ ಹೊಂದಿರುತ್ತವೆ.
