ಮುಂಬಯಿ: ತನ್ನ ಉತ್ಪನ್ನಗಳು ಮತ್ತು ಸೇವೆಯನ್ನು ಉನ್ನತ ಮಟ್ಟದಲ್ಲಿ ಡಿಜಿಟಲೀಕರಿಸಲು ವಿಶೇಷ ‘ಡೈವ್’ ಯೋಜನೆಯನ್ನು(DIVE: Digital Innovation And Value Enhancement) ಸರಕಾರಿ ಸ್ವಾಮ್ಯದ ವಿಮಾ ಕಂಪನಿಯಾದ ಎಲ್ಐಸಿ ಜಾರಿಗೊಳಿಸಿದೆ. ಕಂಪನಿಯಲ್ಲಿ ಡಿಜಿಟಲ್ ರೂಪಾಂತರವನ್ನು ತರುವುದು ಈ ‘ಡೈವ್’ನ ಉದ್ದೇಶ.
ಮುಂಬರುವ ದಿನಗಳಲ್ಲಿ ಹೊಸ ಪ್ರೀಮಿಯಂಗಳ ಬೆಳವಣಿಗೆಗೆ ಹೆಚ್ಚಿನ ಆದ್ಯತೆ ನೀಡಲಾಗುವುದು. ಈ ನಿಟ್ಟಿನಲ್ಲಿ ಕಂಪನಿಯು ಮುಂಬರುವ ತಿಂಗಳುಗಳಲ್ಲಿ 3 ರಿಂದ 4 ಹೊಸ ಪ್ರಾಡಕ್ಟ್ಗಳನ್ನು ಪ್ರಾರಂಭಿಸಲಿದೆ. ಅಲ್ಲದೇ, ಮುಂದಿನ ದಿನಗಳಲ್ಲಿ ತನ್ನದೇ ಆದ ಫಿನ್ಟೆಕ್ ಕಂಪನಿ ಪ್ರಾರಂಭಿಸುವ ಯೋಜನೆಯೂ ಇದೆ ಎಂದು ಭಾರತೀಯ ಜೀವ ವಿಮಾ ನಿಗಮದ (ಎಲ್ಐಸಿ) ಅಧ್ಯಕ್ಷ ಸಿದ್ಧಾರ್ಥ ಮೊಹಂತಿ ಹೇಳಿದ್ದಾರೆ.
‘ಇತ್ತೀಚೆಗೆ ಕೆಲವು ಫಿನ್ಟೆಕ್ ಕಂಪನಿಗಳೊಂದಿಗೆ ಭಾರತೀಯ ಜೀವ ವಿಮಾ ನಿಗಮ ಕೈಜೋಡಿಸಿದೆ. ನಮ್ಮ ಉತ್ಪನ್ನ ವಿತರಣೆಗಾಗಿ ಫಿನ್ಟೆಕ್ ಕಂಪನಿಗಳನ್ನು ಕಾರ್ಪೊರೇಟ್ ಏಜೆಂಟ್ಗಳನ್ನಾಗಿ ಮಾಡಲಾಗಿದೆ. ಈಗ ಎಲ್ಐಸಿ ತನ್ನದೇ ಆದ ಫಿನ್ಟೆಕ್ ಕಂಪನಿಯನ್ನು ಪ್ರಾರಂಭಿಸಲು ಯೋಜಿಸುತ್ತಿದೆ,” ಎಂದು ಸಿದ್ಧಾರ್ಥ ಮೊಹಂತಿ ತಿಳಿಸಿದ್ದಾರೆ.
ಭಾರತೀಯ ಜೀವ ವಿಮಾ ನಿಗಮದಲ್ಲಿ ಡೈವ್ಗೆ ಚಾಲನೆ ಮತ್ತು ಫಿನ್ಟೆಕ್ ಕಂಪನಿಯ ಸ್ಥಾಪನೆ ಕುರಿತಾದ ಬೆಳವಣಿಗೆಗಳ ಹಿನ್ನೆಲೆಯಲ್ಲಿ ಕಂಪನಿ ಷೇರುಗಳು ಭಾರೀ ಏರಿಕೆ ಕಂಡಿವೆ. ಶುಕ್ರವಾರ (ನ. 24) ಎಲ್ಐಸಿ ಷೇರುಗಳು ಶೇ. 9.71ರಷ್ಟು ಭಾರೀ ಜಿಗಿದು 677.70 ರೂ.ಗೆ ತಲುಪಿತ್ತು. ಇದೀಗ ಮಂಗಳವಾರ ಕೂಡ ಕಂಪನಿ ಷೇರುಗಳು ಶೇ. 0.92ರಷ್ಟು ಏರಿಕೆ ಕಂಡಿದ್ದು 683.90 ರೂ. ತಲುಪಿವೆ. ಕಳೆದ ಒಂದು ತಿಂಗಳಲ್ಲಿ ಷೇರು ಶೇ. 13.08ರಷ್ಟು ಏರಿಕೆಯಾಗಿದೆ.
ಆದಾಗ್ಯೂ, ಎಲ್ಐಸಿ ಷೇರುಗಳು 52 ವಾರಗಳ ಗರಿಷ್ಠ ಮಟ್ಟಕ್ಕಿಂತ ಇನ್ನೂ ಕಡಿಮೆಯೇ ಇವೆ. ಎಲ್ಐಸಿ ಷೇರುಗಳ 52 ವಾರಗಳ ಗರಿಷ್ಠ ಮಟ್ಟ 754.25 ರೂ. ಇದೆ. ಷೇರಿನ 52 ವಾರಗಳ ಕನಿಷ್ಠ ಮಟ್ಟ 530.05 ರೂ. ಆಗಿದೆ. ಐಪಿಒ ಬೆಲೆಗೆ ಹೋಲಿಸಿದರೆ ಷೇರುಗಳ ಮೌಲ್ಯ ಇನ್ನೂ ಕಡಿಮೆಯೇ ಇದೆ.
